मलकापूरमध्ये भरधाव ट्रकच दुकानात घुसला!
अजय टप
मलकापूर,(प्रतिनिधी) : चालकाचे नियंत्रण सुटल्याने एम एच-४०-बीसी-५६०८ क्रमांकाचा ट्रॅक थेट बुलढाणा रोडवरील रस्त्याकडेला असलेल्या छोट्या व्यावसायिकांच्या दुकानांमध्ये घुसला. आज २७ डिसेंबरच्या पहाटे २.३० वाजताच्या सुमारास मलकापूर शहरात हा अपघात घडला. या अपघातात जीवितहानी झाली नसली तर व्यावसायिकांचे लाखो रुपयांचे नुकसान झाले.
अपघात इतका जोरदार होता की रस्त्यालगत असलेली टपऱ्या, हातगाड्या व साहित्य पूर्णतः उद्ध्वस्त झाले. सुदैवाने ही घटना पहाटेच्या वेळी घडल्याने मोठी जीवितहानी टळली, मात्र संबंधित व्यावसायिकांचे मोठे आर्थिक नुकसान झाले आहे.
अपघाताची माहिती मिळताच मलकापूर शहर पोलीस घटनास्थळी दाखल झाले. वाहतूक काही काळ विस्कळीत झाली होती. पोलिसांनी तात्काळ पंचनामा करून वाहतूक सुरळीत केली. पोलिसांनी ट्रॅक चालकास ताब्यात घेतले असून या प्रकरणी पुढील कारवाई सुरू आहे.
या घटनेमुळे बुलढाणा रोड परिसरात भीतीचे वातावरण निर्माण झाले असून रस्त्यावरील अतिक्रमण आणि अवजड वाहनांच्या वेगाबाबत नागरिकांमधून तीव्र नाराजी व्यक्त केली जात आहे. भविष्यात अशा घटना टाळण्यासाठी प्रशासनाने कडक उपाययोजना कराव्यात, अशी मागणी होत आहे.
