देवदर्शनासाठी जाणाऱ्या मलकापूरच्या तरुणावर काळाची झडप

मलकापूर येथील चार तरुण स्विफ्ट डिझायर कारने उज्जैन येथे देवदर्शनासाठी निघाले होते. मध्यप्रदेशातील सणावत परिसरात त्यांच्या वाहनाचा अपघात झाला. या अपघातात वाहन चालक पवन रघुनाथ चंबारे (वय २५ वर्षे) रा. हनुमाननगर, मलकापूर याचा घटनास्थळावरच मृत्यू झाला. तर कारमधील इतर तिघेजण गंभीर जखमी झाले असून त्यांना उपचारासाठी रुग्णालयात दाखल करण्यात आले आहे. अपघाताची माहिती मिळताच स्थानिक पोलिसांनी घटनास्थळी धाव घेतली व पंचनामा केला. या दुर्दैवी घटनेमुळे मलकापूर शहरात शोककळा पसरली असून पवन चंबारे यांच्या मृत्यूने कुटुंबीय व मित्रपरिवारावर दुःखाचा डोंगर कोसळला आहे.