विशेष शोधमोहीम: नाशिकचा ‘कॅप्टन’ की वासनांध सैतान?

नाशिक,(प्रतिनिधी): मंत्र-तंत्राचा नावाखाली अधर्माचा बाजार मांडणाऱ्या आणि ‘दैवी शक्ती’चा मुखवटा घालून महिलांच्या असहायतेचा फायदा घेणाऱ्या नराधमांची जागा ही समाजाच्या मध्यभागी नसून तुरुंगाच्या काळकोठडीतच असायला हवी. नाशिकच्या कॅनडा कॉर्नर भागात ‘कॅप्टन’ नावाने प्रसिद्ध असलेल्या अशोक खरात या भोंदू ज्योतिषाने धर्माच्या नावाखाली जे पाशवी कृत्य केले आहे, ते ऐकून माणुसकीलाही लाज वाटेल. एका विवाहित महिलेवर दैवी शक्तीचा धाक दाखवून आणि पतीच्या मृत्यूची भीती घालून वारंवार बलात्कार करणाऱ्या या नराधमाला अखेर पोलिसांनी बेड्या ठोकल्या आहेत.

विश्वासाचा खून आणि भोंदूगिरीचा उच्छाद

अशोक खरात नावाच्या या भोंदूने २०१९ पासून आपल्या जाळ्याची विणणी सुरू केली होती. पीडित महिला जेव्हा तिच्या आयुष्यातील काही समस्या घेऊन याच्याकडे गेली, तेव्हा तिला मदतीचा हात देण्याऐवजी खरातने तिच्या आयुष्यात नरक उभा केला. “मला दैवी शक्ती प्राप्त आहे, मी तुझे सर्व अडथळे दूर करीन,” अशा वल्गना करत त्याने सुरुवातीला पीडितेचा विश्वास संपादन केला. एखाद्या महिलेची श्रद्धा आणि तिचा देवावरील विश्वास यांचा शस्त्र म्हणून वापर करणे, हे कोणत्याही गुन्ह्यापेक्षा भयानक आहे. खरातने पीडितेला श्रीमंत घरच्या लग्नाचे आमिष दाखवले आणि तिथूनच या विनाशाच्या खेळाला सुरुवात झाली.

साखरपुडा मोडला आणि पैशांची लूट सुरू झाली

२०२१ मध्ये जेव्हा पीडितेचा साखरपुडा मोडला, तेव्हा आधार देण्याच्या नावाखाली या ‘कॅप्टन’ने ५० हजार रुपयांना चुना लावला. ‘सिद्ध केलेला’ पुष्कराज खडा देतो, असे सांगून त्याने पीडितेच्या आर्थिक परिस्थितीचा फायदा घेतला. पण त्याची भूक फक्त पैशापुरती मर्यादित नव्हती. त्याची वखवखलेली नजर पीडितेच्या चारित्र्यावर होती.

प्रसादातून ‘विश’ आणि वासनेचा नंगा नाच

नोव्हेंबर २०२२ मध्ये या प्रकरणातील सर्वात काळा अध्याय लिहिला गेला. विधीच्या नावाखाली चेंबरमध्ये बोलावून खरातने पीडितेला पेढा आणि तांब्याच्या भांड्यातील पाणी दिले. त्यामध्ये गुंगीकारक पदार्थ मिसळले होते. ज्या हातांनी आशीर्वाद द्यायचा, त्याच हातांनी त्याने पीडितेचा सन्मान पायदळी तुडवला.

• “मी तुला पवित्र करत आहे,” असे निर्लज्ज विधान करून त्याने पीडितेवर अत्याचार केले. हा केवळ बलात्कार नव्हता, तर एका स्त्रीच्या श्रद्धेचा आणि अस्मितेचा केलेला खून होता.

पतीच्या मृत्यूची भीती: मानसिक छळाची परिसीमा

खरातने केवळ शारीरिक अत्याचारच केले नाहीत, तर पीडितेचा मानसिक छळही केला. “तू माझी प्रेयसी बनून राहिली नाहीस, तर तुझ्यावर देवाचा कोप होईल आणि तुझा पती मरेल,” अशी भीती त्याने तिच्या मनात घातली. लग्नानंतरही या नराधमाने तिला सोडले नाही. आशीर्वादाच्या नावाखाली बोलावून तो वारंवार तिचे शोषण करत राहिला.

राजकीय वलय आणि भोंदूचा ‘कॅप्टन’ अवतार

अशोक खरात हा नाशिकमधील बड्या राजकीय नेत्यांच्या संपर्कात असल्याचे बोलले जात आहे. स्वतःला ‘कॅप्टन’ म्हणवून घेणारा हा माणूस समाजात प्रतिष्ठित असल्याचा आव आणत असे. मंत्र-तंत्राच्या आणि तथाकथित भविष्यवाण्यांच्या नावाखाली त्याने अनेक प्रभावशाली व्यक्तींना आपल्या कचाट्यात पकडले होते. मात्र, कायद्याच्या लांब हातांनी अखेर या नराधमाची मान पकडलीच.

पोलिसांची कारवाई आणि तपासाचे आव्हान

सरकारवाडा पोलिसांनी या प्रकरणाचे गांभीर्य ओळखून खरातला बेड्या ठोकल्या आहेत. न्यायालयाने त्याला पोलीस कोठडी सुनावली असून आता त्याची संपूर्ण ‘कुंडली’ तपासली जात आहे. खरातने आतापर्यंत किती महिलांची अशीच फसवणूक केली? त्याच्या या कृत्यांमध्ये आणखी कोणाचे हात गुंतलेले आहेत? राजकीय वरदहस्तामुळे तो आतापर्यंत वाचत आला होता का?, असे अनेक प्रश्न आता उपस्थित होत आहेत.

दोषीच्या मोबाइलमधील ‘पापाचा पाढा’: ५८ आक्षेपार्ह व्हिडिओ जप्त!

नाशिकच्या ‘कॅप्टन’ अशोक खरातच्या अटकेनंतर तपासाला एक अत्यंत गंभीर वळण मिळाले आहे. पोलिसांनी जेव्हा खरातचा मोबाइल आणि इलेक्ट्रॉनिक उपकरणे हस्तगत केली, तेव्हा पोलिसांनाही धक्का बसला. पोलिसांनी आरोपीच्या मोबाइलमधून तब्बल ५८ आक्षेपार्ह व्हिडिओ जप्त केले आहेत. या व्हिडिओंमध्ये अनेक पीडित महिलांशी संबंधित क्लिप्स, ब्लॅकमेलिंगसाठी वापरले जाणारे चित्रण आणि अश्लील कृत्ये असल्याचे समजते. केवळ एक तक्रारदार महिलाच नाही, तर अनेक महिला या नराधमाच्या शिकारी ठरल्या असण्याची दाट शक्यता आहे. ‘विधी’ करण्याच्या नावाखाली गुंगीचे औषध देऊन महिलांचे व्हिडिओ शूट करणे आणि त्यानंतर ते व्हायरल करण्याची भीती घालून त्यांचे वर्षानुवर्षे शोषण करणे, ही खरातची कार्यपद्धती असल्याचे समोर आले असून आता हे सर्व व्हिडिओ सायबर तज्ज्ञांकडे पाठवण्यात आले असून, डिलीट केलेला डेटा रिकव्हर करण्याचे काम सुरू आहे. या ५८ व्हिडिओंमुळे या प्रकरणाची व्याप्ती वाढली असून, नाशिक पोलीस आता इतर पीडित महिलांना समोर येण्याचे आवाहन करत आहेत. या नराधमाने ‘दैवी शक्ती’च्या नावाखाली किती संसार उद्ध्वस्त केले, याचा आकडा आता वाढण्याची शक्यता आहे.

“हिंदवार्ता”चे आवाहन,नाशिककरांनो सावधान!

हा प्रकार म्हणजे समाजासाठी एक धोक्याची घंटा आहे. संकटाच्या काळात देवाच्या नावाने किंवा ज्योतिषशास्त्राच्या नावाने जे कोणी तुमच्या खाजगी आयुष्यात प्रवेश करू पाहतात, त्यांच्यापासून सावध राहण्याची गरज आहे. अशोक खरातसारखे भोंदू हे समाजाला लागलेली वाळवी आहेत. जर या नराधमाने इतर कोणाची फसवणूक किंवा छळ केला असेल, तर त्यांनी न घाबरता पुढे येऊन पोलिसांत तक्रार करावी. अशा नराधमांना फासावर लटकवल्याशिवाय या पीडितेच्या आत्म्याला शांतता मिळणार नाही. नाशिकच्या या ‘कॅप्टन’चा खरा चेहरा आता जगासमोर आला आहे. आता वेळ आहे त्याला कायद्याचा असा धडा शिकवण्याची, जेणेकरून भविष्यात कोणताही खरात पुन्हा ‘दैवी शक्ती’चा खोटा आव आणण्याचे धाडस करणार नाही!